راولپنڈی ۔27اگست (اے پی پی):پاک فوج دے شعبہ تعلقاتِ عامہ دے سربراہ میجر جنرل بابر افتخار آکھیے جو افغانستان اچ عسکری صورتحال ٻہوں تکھے بدلی اے ،پاکستان دے پاسے افغان سرحد تے حالات مکمل قابو اچ ہن، طالبان دی طرفوں افغان سرزمین کہیں ملک دے خلاف استعمال نہ تھیوݨ دا یقین ݙیوایا ڳئے ، بھارت دا کردار ہمیشہ منفی رہیے جیں افغانستان اچ سرمایہ کاری صرف پاکستان کوں ضیان پڄاوݨ دی نیت نال کیتی ، پاکستان اچ امن و امان افغانستان اچ دیرپا امن نال جڑیا ہویا اے ، پاکستانی قوم دی حمایت نال مسلح افواج دہشت گردی دے خلاف جنگ اچ کامیابیاں حاصل کیتن۔ جمعے کوں پریس کانفرنس توں خطاب کریندے ہوئیں انہاں آکھیے جو افغانستان اچ 15 اگست دے بعد عسکری صورتحال اچ تکھے تبدیلی آئی اے ، کہیں کوں وی اندازہ کائناں ہئی جو تکھے حالات بدلسن ، پاکستان ممکنہ صورتحال دے پیش نظر پاک۔افغان بارڈر کوں محفوظ بݨاوݨ کیتے اقدامات کیتے ، بین الاقوامی سرحد دی پاکستانی سائیڈ مکمل طور تے محفوظ اے۔ انہاں آکھیے جو افغان سرحد تے عدم استحکام دی صورتحال پاروں فوجی دستے تعینات کیتے ڳئن ، سرحد تے قانونی دستاویزات دے نال ہمدردی دی بنیاد تے نقل و حمل دی اجازت اے۔ انہاں آکھیے جو پاکستان افغانستان چھوڑ ݙیوݨ آلے غیر ملکیاں دے انخلاء کیتے پروازاں دی اجازت ݙتی اے ۔ میجر جنرل بابر افتخار آکھیے جݙاں مغربی سرحد تے دہشت گردی دے خلاف آپریشن چلدے پئے ہن تے مشرقی سرحد تے بھارت دی طرفوں سیز فائر دیاں خلاف ورزیاں تھیندیاں پیاں ہن اے او ویلھا ہئی جݙاں پاکستان جامع بارڈر منیجمنٹ سسٹم دا اہتمام کیتا۔انہاں آکھیے جو آرمی چیف جنرل قمر جاوید باجوہ سرحد مکمل طور تے محفوظ بݨاوݨ دا وژن ݙتا ، اہم بارڈر ٹرمینلز کوں جدید ٹیکنالوجی نال لیس کیتا ڳئے ، انہاں آکھیے جو 2012ء تئیں پاکستان اتے افغانستان وچال کوئی باقاعدہ بارڈر میکنزم موجود کائناں ہئی ݙوہیں ملکاں وچال سرحدی انتظام دے حوالے نال اقدامات کیتے ڳئے جݙاں جو خفیہ اطلاعات دے تبادلے کیتے وی طریقہ کار وضع کیتا ڳیا ، افغان سرحد تے باڑ بارے انہاں آکھیے جو اے ھک ٻہوں وݙی تے اہم کاوش ہئی، ایں کم دے دوران کئی پاکستانی فوجیاں دیاں جاناں ڳئن ، پاک افغان سرحد تے باڑ لاوݨ دا 90 فیصد کم کر ڳھدا ڳئے ، انہاں آکھیے اڄوکے ݙینھاں پاکستان اتے ایران دی سرحد تے وی باڑ لاوݨ دا کم تھیندا پئے 50 فیصد مکمل تھی ثکے ۔ میجر جنرل بابر افتخار آکھیے جو پاکستان افغانستان کوں سرحد تے سکیورٹی اتے انٹیلی جنس تعاون دے علاوہ فوجیاں دی تربیت دی کئی واری پیشکش کیتی تاں جو صرف کجھ ہی افغان افسر اتھاں آئے جبݙاں جو ودھ ساریں بھارت توں تربیت ڳھدی ۔ افغانستان کوں تعاون دی ایں پیشکش دا پس منظر ݙسیندے ہوئیں انہاں آکھیے جو پاکستان اچ امن و امان افغانستان اچ امن دے قیام نال جڑیا ہویا اے ۔ انہاں آکھیے افغان عوام دے بعد ایں جھیڑے دا ساریں توں ودھ ضیان پاکستان کوں تھئے ، پاکستان کوں 80 ہزار توں ودھ قیمتی جاناں دے نال 102 بلین ڈالر دے معاشی ضیان وی برداشت کرݨے پئن جݙاں جو حالی وی گنتی جاری اے ۔ انہاں آکھیے جو قوم دی حمایت نال دہشت گردی دے خلاف کامیاب آپریشنز توں دہشت گردی گھٹ تھئی ۔ میجر جنرل بابر افتخار آکھیے جو پاکستان اتے افغانستان دے درمیان 78 راہداریاں ہن جنہاں اچوں 17 سرکاری نوعیت دیاں ہن ، 5 راہداریاں توں تجارت تھیندی پئی اے جݙاں جو 73 بند ہن۔ انہاں آکھیے جو پاکستان ہی افغانستان توں انخلا دے عمل دا ساریں توں اہم حصہ اے اتے ہݨ تئیں 5500 غیر ملکیاں کوں پاکستان دے ذریعے افغانستان توں کھڈیا ڳئے ۔
